Dreeduuster ( Vasse ) Veur Nick

As ut allermooiste liedje vlak veur dat ut wot e spölt
Op de weagschoale met Ikarus den nit meer vlög en nog net nit völt
A’k de ruumte en de tied met blote haane dubbel voal
Da’s de eerste en de leste keer de eerste en de leste keer
Dat ik eindeloos eindeloos van oe hoal

A’j de piep nog in de oor’n van ut leste fluitsignaal
A’j oe plots realiseert d’is de leste keer da’k ademhaal
As de taal oe deur de vingers glipt as oetstarvend gefluuster
Woar al ut plompverloarene niks ut wint
Woar alles eindeloos opnieuw begint
En alle dagen alle dagen alle dagen bliekt e dreumt
In ut Dreeduuster in ut Dreeduuster

Dat goddelukke inzicht a’j alles helder maakt
En zwaaiend met nun kruus deur de bliksem wot e raakt
A’j de jongste dag beleaft op de skolders van de oal’n
In dee deur god vergett’n stilstand In dee deur god vergett’n stilstand
Zal ik eindeloos eindeloos van oe hoal’n

A’j de piep nog in de oor’n van ut leste fluitsignaal
A’j oe plots realiseert dit is de leste keer da’k ademhaal
As de taal oe deur de vingers glipt as oetstarvend gefluuster
Woar al ut plompverloarene niks ut wint
Woar alles eindeloos opnieuw begint
En alle dagen alle dagen alle dagen bliekt e dreumt
In ut Dreeduuster in ut Dreeduuster

’t Is allemoal e dreumt

Usselo

Ik wil vriej’n as vrogger
Ik wil ut mieters ik wil ut flex
Ik wil deur nun hoepel spring’n
Op mien Tyrannosaurus Rex
Ik wil huul’n um niks
Bie de juffrouw op schoot
Ik wil ut vreezen klean
En ut verlangen groot

Wil in de speegel grijnzen
Noar nun jonge god
As pasgeborene leren drieven in de taal
Ik wil dat alles weer normaal wot

Ik wil weer vree op aard
Sloa alleen nog nun brugge
Nun ieder vrie van schuld
En de florijn terugge
Ik wil nun machtig mooie mure
Dwars deur Berlien
En de Russen weer verstopt
Achter ut Iezeren Gordien

Wil in de speegel grijnzen
Noar nun jonge god
As pasgeborene leren drieven in de taal
Ik wil dat alles weer normaal wot

Ik wil de dreumers wakker
En alle aso’s in coma
Ik wil weer dreudjesfleisch
Bie mien opa en oma
Ik wil dansen as un boer
Op Steetjes Quo
En ut vuur van de Olympus
T’rug in Usselo

Eppenzolder

Eppenzolder Flophouse
t ‘Asiel veur iederene
Eppenzolder Flophouse
Hier sloap ie nooit allene
Eppenzolder Flophouse
Veerentwintig zeume
Eppenzolder Flophouse
Boek noe oew wildste dreume

Alle Rock n Roll Junkies
Pleert oe dale
En viert met oons de schoonheid
Van ut abnormale
Zet oew allerleste noald
In de grieste elpee
En dans met Eelco Gelling
Op Harry Muskee

Eppenzolder Flophouse
’t Asiel veur iederene
Eppenzolder Flophouse
Hier sloap ie nooit allene
Eppenzolder Flophouse
Veerentwintig zeume
Eppenzolder Flophouse
Boek noe oew wildste dreume

He’j met ut goeie niks
En met de vrede nit völle
Ofslag zes zes zes
Van de snelweg noar de Helle
Drink Bon Scott onder toafel
Zo hard aj mar kunt
En fluuster ‘m zachtjes in ut oor
Da’j Janis Joplin bunt

Eppenzolder Flophouse
’t Asiel veur iederene
Eppenzolder Flophouse
Hier sloap ie nooit allene
Eppenzolder Flophouse
Veerentwintig zeume
Eppenzolder Flophouse
Boek noe oew wildste dreume
Boek noe oew wildste dreume

Enter

De Fanfare van de Zwalkende Zompe
Spölt de Wals van Iederene
En eeuwig zingt de Regge heur duet
Eeuwig zingt de Regge heur duet

Ut neuriën van asfalt
Ut lech licht oet de moate
Nun opgevoerde schoeftrompet
Schöf giechelend oaver stroate
En kiek doar dankt nun knotwilg
Zien oetzinnige publiek
A’j veult wa’j nit wult heur’n
Klinkt oaveral muziek

Kreeien krast hun requiem
En ik hun dirigent
Bun de Componist van Alles
De hele wearld zit in mien band
Al in ut intro loak ut storm’n
Met mais dat alsmaar helliger wot
Woarnoaj’t bie Roetgerink heurt donderen
Tijdens ut daverende slot

De Fanfare van de Zwalkende Zompe
Spölt de Wals van Iederene
En eeuwig zingt de Regge heur duet
Eeuwig zingt de Regge heur duet
Eeuwig zingt de Regge heur duet
Heur duet met de A Ene

Zo lang de loch nog trilt
Zo lang ’t mie an kump weaj’n
Zo lang de oor’n nog wilt
Blief ik de eerde dreei’n
As nun singeltje

Doezend Leams (Oaverdinkel)

Nog 1 keer mien dagen van gek en onwies
Dronken in Napels stoned in Paries
Met al wa’ k heb de openbare eerbaarheid schend’n
Nog 1 keer op ut nippertje de weareld redd’n
Hangend met nun neagel an de Katmandu
Veur de kachel in de Soos vriejen met oe
Nog 1 keer as miezelf an ut begin van alles stoan
Um dan oeteindeluk as de zunne
Boaven Oaverdinkel onder te goan

Nog 1 keer um ut of te leer’n
Nog 1 keer spöln veur God
Nog 1 keer um te kieken
Of ut dit keer anders wot
Zo godvergetten treurig is mien lot
Ik komme doezend leams te kot

Nog 1 keer op de kneene nog 1 keer gena
Nog 1 keer mien moo nog 1 keer mien vaa
De meakes as nieuw um te stottern zo mooi
Ut worsteln verbetterd utzelfde geknooi
En wa’k nog bloot heb liggen krig oew punt in mien verhaal
‘k Zal alle geate dichten met de allermooiste taal
Zoda’k nog 1 keer as miezelf an ut end van alles stoa
Woarnoa’k tot slot in nun oneindige herhaling
Steeds opnieuw ten onder goa

Nog 1 keer um ut of te leer’n
Nog 1 keer spöln veur God
Nog 1 keer um te kieken
Of ut dit keer anders wot
Zo godvergetten treurig is mien lot
Ik komme doezend leams te kot

Oet Leefde (Mariaparochie)

Dreewarf halleluja
D’r is ’n nieje god geboor’n
Steet nog nit op eigen beene
Is nog nat achter de oor’n
Dus hangt um an de liene
Bloas het leaven in zien hat
En alle foutjes in’t ontwarp
Die striekt wie later wa weer glad

Oet leefde allemoal oet leefde

Klei oew mooiste godsbeeld
Oet zand, oet stof, oet lego
En wet a’j op de kneene valt
Ie aanbid oew eigen ego
De bange leu ze knutselt
Allemoal nun iezeren god
Den van mie den is ut grootste
En alle ander’n mot kapot

Oet leefde allemoal oet leefde

Ooh zo heerluk ut verdwaaln
In de taal woarin wie bid
Elke god zien camouflage
Den van ons is maagdeluk wit
Heb geen vrees veur disse leugte
Umarm ut galmen in oew kop
Op het slagveld der ideeën
Steet allene den van ons weer op
Oet leefde allemoal oet leefde

Dreewarf halleluja

Losser

Nemmt oew dagelukse dogma’s
Met nun flinke korrel zolt
Hoe zinloos al ut trekken
An dat wat a vanzelf rolt

Ast in vrede ok geet lukk’n
Verspil oew tied nit met geweld
Woarum de dag nog plukk’n
As de nacht vanzelluf veult

Stroom as water deur oew leam’n
Heb de wind aait in de rugge
Loos alle oavertoligheid
Maak van nun olifant nun mugge
En leaf
En leaf
En leaf
Lösser
En leaf

Weas doof veur hoe ut heurt
Beheers de kunst van ut vergett’n
Verwarf nun luier inzicht
Deur ut buug’n van de wetten

Al ut zinloze geciever
Doar ku’j ut beste mar met stoppen
Van alles onder de streep
Mot allene ut hatte kloppen

Stroom as water deur oew leam’n
Heb de wind aait in de rugge
Loos alle oavertoligheid
Maak van nun olifant nun mugge
En leaf
En leaf
En leaf
Lösser
En leaf

Ambitie is niks dan skildern
Met nun lellukke klodder varve
Ik goa doelloos deur mien leam’n
Ik zeuke nit ik zwarve

Wat is ut hier mooi (Maarkel)

Wat is ut hier mooi
Al dat greun en dat blauw
En dat wit
Met dat grös en dat mos
En die beume
En die biej’n die zoemt
Dat ze postbodes bunt
Wijl ze’t stoefmeel bezorgt
Bie de bleume

Bu’j d’r eenmoal e wes
Kun ie nooit meer zonder
Een volmaakt paradies
En nun wereldwonder
Van nun achterluk duuzelingwekkend allooi
Wat is ut hier
Wat is ut hier
Mooi

Wat is het hier mooi

Kiek die leu hoe ze straalt
Hoe ze glimt
Paraderend as fotomodellen
Zo skitterend he’j ze
Nog nimmer e zeen
Ut is ut feest
Van de vallende schellen

Bu’j d’r eenmoal e wes
Kun ie nooit meer zonder
Een volmaakt paradies
En nun wereldwonder
Van nun achterluk duuzelingwekkend allooi
Wat is ut hier
Wat is het hier
Mooi

Soasel

As niks hier nog vanzelluf geet
As alles oe vermeujt
Steeds stroever al ut denken
Asof dr met Velpon is e streujt
As alles langs oe en geet
As niks oe warkeluk raakt
Neegntien dooie keender
De skoale of e maakt in

Soasel
De kop vol
Soasel

As oew positieve wereldbeeld
An flarden wot e skeurt
As al wat unveurstelbaar is
Zwat daageluks gebeurt
Wat rest is de verbeelding
En nun akeligen krater
Noa de Russische Roulette
Op een Oekraiens theater

Soasel
De kop vol
Soasel

Ut succes mot aait verzekerd
Ze kunt dr aans nit an beginn’n
Umdat metdoan nooit genog is
Umdat ze allene mar wilt winn’n
In nun wearld den slechts um geld dreait
Is allene de markt nog vrie
En dat dat dan genog is
Ik kan dr met de kop nit bie in

Soasel
De kop vol
Soasel

Glane

’T is zunnen dag woarop alles met zit
En ik mie onoaverwinneluk wane
As de Koning te Riek
As Mesjeu Magnefiek
As de Goeie God oet Glane

Al ut volk da’k tijdens
Mien rondgang zie
Ze valt op de knene
En ze bidt tot mie
Ze wilt da’k ze geneze
Bunt bang veur de dood
Ze wilt botter bie de vis
Op hun dagelukse brood

Oh de leu, zo sneu zo sneu, de leu, zo sneu

’T is zunnen dag woarop alles met zit
En ik mie onoaverwinneluk wane
As de Koning te Riek
As Mesjeu Magnefiek
As de Goeie God oet Glane

Stokoale kealkes
Vel oaver been
Die hun vrouwe geerne
Dartig joar jonger wilt zeen
En die mo’k dan teleurstell’n
Dus wat zeg ik ze dan
Da’k as god godverdomme
Nit heksen kan

Skeure in God (Zenderen)

Van de tamste kastanjes
Tot de wildste ideejen
Van de mooiste heksen
Tot de lellukste feejen
Van de fienste skilder
Tot de botste boer
Van de knorrende maagd
Tot de oale hoer
Van de infantiel
Tot de onverloat
Van de allerbeste
Tot ut puurste kwoad

Dr zit nun barst in de Duvel
En nun scheure in God
Niks is nog veur eeuwig
Ut geet allemoal kapot

Oew goeie eerde
Mien valse plat
Oew nooit meer oorlog
Mien altied wat
Oew natte dreum
Mien dorre hat
Oew land te klean
Mien ruumte zat
Oew dubbele tonge
Mien giftige penne
Oew nimmer dissen
En mien altied denne

Ut dut d’r nit toe (Broenehoar)

O’k noe links of rechtsum dreaje
O’k ut noe allemoal anders doe
Ut dut dr nit toe ut dut dr niet toe
Of ik noe dronken van geluk bun
Of ik noe alle dagen zat
Of ut mooiste nog mot kommen
Of ik ut argste heb e had
O’k noe hoal van alle vrouwleu
Of allene mar van oe
Ut dut dr nit toe ut dut dr nit toe
O’k noe niks wet van woarumme
O’k noe alles wet van hoe
Ut dut dr nit toe ut dut dr nit toe
O’k noe in de reagen danse
Of ik noe veur de zunne skuul
Of ik noe schuddeboekend lache
Of ik noe hartverscheurend huul
Of ik noe drief op mien verlangen
Of ik noe in de tied verzoep
Of ik noe starte as de bliksem
Of ik noe noar de finish kroep
O’k noe niks wet van woarumme
O’k noe alles wet van hoe
Ut dut dr niet toe ut dut dr nit toe
O’k noe links of rechtsum dreeje
O’k ut noe allemoal anders doe
Ut dut dr nit toe
Of ik mie lös zing van de eerde
Of ik noe van de wereld bun
Of ik ut eerluk wil verdelen
Of ik ut niemand anders gun
Of ik ut zee as unveurstelbaar
Of ik ut onvermijdeluk neum
Of ut mie treft as openbaring
Of ut veurbie kump in nun dreum
O’k noe links of rechtsum dreeje
O’k ut noe allemoal anders doe
Ut dut dr nit toe ut dut dr nit toe
O’k noe hoal van alle vrouwleu
Of allene mar van oe
Ut dut dr nit toe ut dur dr nit toe

Ut kan nog (Almelo)

Veur de warkelukke optimist
Zal aait de zunne skien’n
Den zeet al ut menseluk ongeluk
As bie toverslag verdwienn’n
Hee löp juichend deur ut stadion
Dat de kansen bunt e keert
Ok al wet e dat zien club
Al in mei is e degradeert
mar wat zol’t

Ut kan nog
Dr is nog niks verloorn
En as ut noe nit lukt
Dan wo’j opnieuw geboorn
En dan rol ie met oew dwarse kop
Oew leamn den zelfden barg weer op
Ut kan nog

O’j noe zeumtig joar en maagd bunt
Leaf oew daag’n nit te bedrukt
Dr valt aaltied iets te reegeln
Da’s met Prins Andrew ok e lukt
En val ie oet nun vliegtuig
En geet de parasjuut nit lös
Bidt dan um nun asperientje
En ut allerallerallerzachtste grös

Ut kan nog
Dr is nog niks verloorn
En as ut noe nit lukt
Dan wo’j opnieuw geboorn
En dan rol ie met oew dwarse kop
Oew leamn den zelfden barg weer op
Ut kan nog
D”r is nog niks verloor’n

En in koor zingt menig achterheuf
Waor bun’k godsnaam an begonn’n
100 dagen oorlog
En niemand hef’t e wonn’n
Doezend dagen
Alle dagen

Ut kan nog
Dr is nog niks verloorn
En as ut noe nit lukt
Dan wo’j opnieuw geboorn
En dan rol ie met oew dwarse kop
Oew leamn den zelfden barg weer op
Ut kan nog
D’r is nog niks verloor’n

Azelo

Umda’j ut eeuwige zwarven zat bunt
Umda’j toch argens mot beginn’n
Umda’j snakt noar nun betjen vrede
Umda’j oew oorlog nit kunt winn’n
Umdat ie ok nun skiere vlagge
Umda’j oew eagen grenzen trekt
Umda’j ut vlucht’n bar en beu bunt
Umda’j ut oprotten verrekt

Ik kan oe dit beloam’n
Ie kriegt ut nit kado
Van nun zommerpaleis in Bagdad
Tot helemoal niks in Azelo

Umda’j ut juuste woord nit veen’n kunt
Umdat oew taal nog nit besteet
Umda’j dagdreumt van ut wortel’n
Umda’j wet wa’j nog nit weet
Umdat de wearld oe veuls te groot is
Umda’j gin vijand um te heul’n
Umdat gin volk ooit zo allene was
Umda’j oe argens thoes wilt veul’n

Westerhoar

Met oew hagelwitte tane
Met oew ofgetrainde lief
Met oew donders dure oto
Met oew prieswinnende wief
Met al oew niejste van ut niejste
Met oew altied al e zeg
Met oew better kuj’t nit krieg’n
Met oew volkswil is de weg

Wat ku’j dan
Wat mo’j dan
Wat wu’j dan
Wat zo’j dan
A’j nit in staat bunt um te deeln
Goat dr iemand anders met verveeln

Met oew alles is veur Bassie
Met oew snotterd aait veuran
Met oew griepen wa’j kunt griepen
Met oew Gaastra jasje an
Met al oew niks woar ik in verzoepe
Met al ut vet woarop ie drieft
Ut is veur Westerhoar ut beste
Da’j lekker in de Randstad blieft